ബെംഗളുരു: മെട്രോ സ്റ്റേഷനുകളിൽ അധികസമയം ചെലവഴിക്കുന്നവരാണോ നിങ്ങൾ? ബെംഗളുരു മെട്രോയിൽ യാത്ര ചെയ്യുമ്പോൾ ഈ ശീലം ഒഴിവാക്കുന്നതായിരിക്കും ബുദ്ധി.
മെട്രോ സ്റ്റേഷനുകളിൽ അനുവദിച്ചിരിക്കുന്ന 20 മിനുട്ടിലുമധികം സമയം ചെലവഴിക്കുന്നവരിൽ നിന്ന് 50 രൂപ പിഴയാണ് ബിഎംആർസിഎൽ ചുമത്തുന്നത്.
നേരത്തെയുള്ള നിയമം തന്നെയാണെങ്കിലും അടുത്തിടെ ഒരു യാത്രക്കാരന് പിഴ ലഭിച്ചതോടെയാണ് ഇത് വീണ്ടും ചർച്ചയായത്.
അധികം യാത്രക്കാർക്കും ഇങ്ങനെയൊരു നിയമം ഉള്ളതായി അറിവില്ലെന്നതാണ് യാഥാർത്ഥ്യം. മെട്രോയിലെ തിരക്ക് ഒഴിവാക്കുന്നതിന് വേണ്ടിയാണ് ഈ നിയമം കർശനമായി നടപ്പാക്കുന്നത്.
അരുൺ കെ എന്ന യാത്രക്കാരനാണ് 5 മിനുട്ട് അധികം സമയം ചെലവഴിച്ചതിന് 50 രൂപ പിഴ ലഭിച്ചതെന്ന് വിവിധ മാധ്യമങ്ങൾ റിപ്പോർട്ട് ചെയ്തു.
ശക്തമായ മഴ പെയ്യുന്നതിനാൽ മൊബൈൽ ഫോൺ ചാർജ് ചെയ്യുന്നതിനാണ് യുവാവ് മെട്രോ സ്റ്റേഷനിൽ അധികസമയം നിന്നത്.
എന്നാൽ പുറത്തേക്ക് വന്നപ്പോൾ 50 രൂപ സ്മാർട്ട് കാർഡിൽ നിന്ന് നഷ്ടപ്പെട്ടതായി വ്യക്തമാവുകയായിരുന്നു. പണം നഷ്ടപ്പെട്ടത് മനസ്സിലായപ്പോൾ ഇയാൾ മെട്രോ സ്റ്റാഫുമായി ബന്ധപ്പെട്ടു.
അപ്പോഴാണ് കൂടുതൽ സമയം ചെലവഴിച്ചതിന് പിഴ ഈടാക്കുന്ന കാര്യം അറിയാൻ സാധിച്ചത്.
എന്നാൽ ഈ നിയമം മെട്രോയുടെ തുടക്കകാലം മുതൽ നിലവിലുള്ളതാണെന്നും പുതിയതായി കൊണ്ടുവന്നതെല്ലുമാണ് ബിഎംആർസിഎൽ പറയുന്നത്.
നിയമത്തെ കുറിച്ച് ആളുകൾ അറിവില്ല എന്ന പ്രശ്നം പരിഹരിക്കാനാണ് നമ്മ മെട്രോ അധികൃതരുടെ നീക്കം. എല്ലാ മെട്രോ സ്റ്റേഷനുകളിലും ഇതുമായി ബന്ധപ്പെട്ട വിവരങ്ങൾ പ്രദർശിപ്പിക്കാനാണ് ബിഎംആർസിഎല്ലിൻ്റെ നീക്കം.
നിലവിൽ ബിഎംആർസിഎൽ വെബ്സൈറ്റിലും മെട്രോ യാത്രയുമായി ബന്ധപ്പെട്ട മുഴുവൻ നിയമങ്ങളും നിയന്ത്രണങ്ങളും നൽകിയിട്ടുണ്ട്.
വികസനത്തിൻ്റെ പാതയിലാണ് നിലവിൽ ബെംഗളുരു മെട്രോ. മെട്രോ പ്രേമികൾ ഏറെ കാത്തിരുന്ന നാഗസാന്ധ്ര – മഡവര ഗ്രീൻ ലൈൻ മെട്രോ ഈ വർഷം ജൂലൈ അവസാനത്തോടെ പ്രവർത്തനമാരംഭിച്ചേക്കും.
അഞ്ചു വർഷക്കാലത്തെ കാലതാമസം നേരിട്ടതിന് ശേഷമാണ് ഗ്രീൻ ലൈൻ പ്രവർത്തനമാരംഭിക്കുന്നത്. ഭൂമി ഏറ്റെടുക്കൽ വൈകിയതും കൊവിഡ്-19 മഹാമാരിയുടെ വരവുമാണ് പദ്ധതി വൈകിയതിന് കാരണമായത്.
ബെംഗളൂരുവാർത്തയുടെ ആൻഡ്രോയ്ഡ് ആപ്ലിക്കേഷൻ ഇപ്പോൾ ഗൂഗിൾ പ്ലേസ്റ്റോറിൽ ലഭ്യമാണ്, പോർട്ടലിൽ പ്രസിദ്ധീകരിക്കുന്ന വാർത്തകൾ വേഗത്തിൽ അറിയാൻ മൊബൈൽ ആപ്പ് ഇൻസ്റ്റാൾ ചെയ്യുക. If you cannot read Malayalam,Download BengaluruVartha Android app from Google play store and Click On the News Reader Button. [masterslider id="10"]
